sar-e-bazm meri nazar se jab wo nigah-e-hosh-ruba mili

sar-e-bazm merī nazar se jab vo nigāh-e-hosh-rubā milī

kabhī zindagī kā maza milā kabhī zindagī kī sazā milī

ka.ī manziloñ se guzar ga.e to hameñ ye rāh-e-vafā milī

kahīñ dil milā kahīñ dard-e-dil kahīñ dard-e-dil kī davā milī

tumheñ yaad hai mire sāthiyo ki bichhaḌ ga.e the vahīñ se ham

tumheñ dard-e-dil kī davā milī mujhe dard-e-dil kī duā milī

na bahā sake kabhī ashk bhī tirī barhamī ke ḳhayāl se

ga.e le ke jalte charāġh ham to hamesha tez havā milī

nahīñ ġham jo mujh ko zamāne meñ koī ġham kī daad na de sakā

magar un ke dil pe likhī huī mirī dāstān-e-vafā milī

dil-e-kā.enāt taḌap uThā vo shu.ūr-e-naġhma atā kiyā

jo sadā-e-sāz-e-hayāt se mire sāz-e-dil kī sadā milī

jo zamāna bhuul gayā to kyā ki chalan yahī hai zamāne kā

magar un ke dil pe likhī huī mirī dāstān-e-vafā milī

sar-e-bazm meri nazar se jab wo nigah-e-hosh-ruba mili

kabhi zindagi ka maza mila kabhi zindagi ki saza mili

kai manzilon se guzar gae to hamein ye rah-e-wafa mili

kahin dil mila kahin dard-e-dil kahin dard-e-dil ki dawa mili

tumhein yaad hai mere sathiyo ki bichhaD gae the wahin se hum

tumhein dard-e-dil ki dawa mili mujhe dard-e-dil ki dua mili

na baha sake kabhi ashk bhi teri barhami ke KHayal se

gae le ke jalte charagh hum to hamesha tez hawa mili

nahin gham jo mujh ko zamane mein koi gham ki dad na de saka

magar un ke dil pe likhi hui meri dastan-e-wafa mili

dil-e-kaenat taDap uTha wo shuur-e-naghma ata kiya

jo sada-e-saz-e-hayat se mere saz-e-dil ki sada mili

jo zamana bhul gaya to kya ki chalan yahi hai zamane ka

magar un ke dil pe likhi hui meri dastan-e-wafa mili