sar-e-diwar ye elan lagaya jae

sar-e-dīvār ye e'lān lagāyā jaa.e

abr ke saa.e se sūraj ko bachāyā jaa.e

TuuT hī jaa.e fazāoñ meñ ḳhamoshī kā hisār

varna phir maut kā ehsās dilāyā jaa.e

jin sadāoñ ke bhaTakne se havā zinda thī

ḳhvāb-rastoñ se unheñ DhūñD ke laayā jaa.e

shab ke tārīk parindoñ kī ḳhabar-gīrī ko

dhuup meñ baiTh ke logoñ ko bulāyā jaa.e

aaj phir pyaas ke Tīloñ se bagūle uTTheñ

aaj phir abr kā imkān dikhāyā jaa.e

baaḌh aane se makānoñ ke bharam TuuTe haiñ

naam kis kā sar-e-dahlīz lagāyā jaa.e

baad ke zaḳhm to bhar jā.eñge dhīre dhīre

pahle maazī ke hisāboñ ko chukāyā jaa.e

sar-e-diwar ye e'lan lagaya jae

abr ke sae se suraj ko bachaya jae

TuT hi jae fazaon mein KHamoshi ka hisar

warna phir maut ka ehsas dilaya jae

jin sadaon ke bhaTakne se hawa zinda thi

KHwab-raston se unhen DhunD ke laya jae

shab ke tarik parindon ki KHabar-giri ko

dhup mein baiTh ke logon ko bulaya jae

aaj phir pyas ke Tilon se bagule uTThen

aaj phir abr ka imkan dikhaya jae

baDh aane se makanon ke bharam TuTe hain

nam kis ka sar-e-dahliz lagaya jae

baad ke zaKHm to bhar jaenge dhire dhire

pahle mazi ke hisabon ko chukaya jae