sar-e-kakul ko na o shoKH-e-trahdar tarash

sar-e-kākul ko na o shoḳh-e-trahdār tarāsh

kaaT khā.egā ye uḌ kar na sar-e-mār tarāsh

ab to sar hote haiñ das biis ke har roz qalam

ḳhuub ye tū ne nikālī hai jafā-kār tarāsh

ḳhat to ye maiñ ne hī likkhā thā ḳhatāvār huuñ maiñ

haath qāsid ke liye tū ne sitamgār tarāsh

māh-e-nau chuum hī le us ko falak se gir kar

pheñk deve jo vo nāḳhun pas-e-dīvār tarāsh

tezī-e-teġh hai kyā chaal meñ us kāfir kī

saikḌoñ dil diye us ne dam-e-raftār tarāsh

qatl kartā hai to kar shauq se 'tanvīr' ko tū

rañj-āmez na bāteñ but-e-ayyār tarāsh

sar-e-kakul ko na o shoKH-e-trahdar tarash

kaT khaega ye uD kar na sar-e-mar tarash

ab to sar hote hain das bis ke har roz qalam

KHub ye tu ne nikali hai jafa-kar tarash

KHat to ye main ne hi likkha tha KHatawar hun main

hath qasid ke liye tu ne sitamgar tarash

mah-e-nau chum hi le us ko falak se gir kar

phenk dewe jo wo naKHun pas-e-diwar tarash

tezi-e-tegh hai kya chaal mein us kafir ki

saikDon dil diye us ne dam-e-raftar tarash

qatl karta hai to kar shauq se 'tanwir' ko tu

ranj-amez na baaten but-e-ayyar tarash