sar-e-mahfil dil-e-tanha pe hansi aati hai

sar-e-mahfil dil-e-tanhā pe hañsī aatī hai

mujh ko is ġhuncha-e-sahrā pe hañsī aatī hai

haañ tirā va.ada-e-fardā thā kabhī vaj.h-e-hayāt

ab isī va.ada-e-fardā pe hañsī aatī hai

shab-e-mah mausam-e-gul aur javānī tauba

aisī be-vaqt kī tauba pe hañsī aatī hai

kabhī TuuTī huī kashtī pe taras aatā hai

kabhī chaḌhte hue dariyā pe hañsī aatī hai

maiñ javāñ huuñ mirī fitrat kā taqāzā hai kuchh aur

mujh ko andesha-e-fardā pe hañsī aatī hai

chaar tinkoñ kā jalānā bhī baḌī baat thī kuchh

barq kī zahmat-e-be-jā pe hañsī aatī hai

chāhte haiñ ki unheñ dil se bhulā duuñ maiñ 'sa.īd'

aisī ma.asūm tamannā pe hañsī aatī hai

sar-e-mahfil dil-e-tanha pe hansi aati hai

mujh ko is ghuncha-e-sahra pe hansi aati hai

han tera wada-e-farda tha kabhi wajh-e-hayat

ab isi wada-e-farda pe hansi aati hai

shab-e-mah mausam-e-gul aur jawani tauba

aisi be-waqt ki tauba pe hansi aati hai

kabhi TuTi hui kashti pe taras aata hai

kabhi chaDhte hue dariya pe hansi aati hai

main jawan hun meri fitrat ka taqaza hai kuchh aur

mujh ko andesha-e-farda pe hansi aati hai

chaar tinkon ka jalana bhi baDi baat thi kuchh

barq ki zahmat-e-be-ja pe hansi aati hai

chahte hain ki unhen dil se bhula dun main 'said'

aisi masum tamanna pe hansi aati hai