سر راہ کوئی مجھے ملا کہ نقاب رخ سے اٹھا دیا

سر راہ کوئی مجھے ملا کہ نقاب رخ سے اٹھا دیا

اک عجیب شعلۂ حسن تھا دل و جاں میں آگ لگا دیا

وہ تڑپتا مجھ کو یوں چھوڑ کر مجھے حیرتوں میں وہ ڈال کر

وہ کدھر سے آیا کہاں گیا نہ تو نام اور نہ پتا دیا

ہے رگوں میں خون یا آگ ہے یہ عجیب طرح کی لاگ ہے

وہ زباں پہ عشق کا راگ ہے کہ جو ساز دل نے سکھا دیا

مرے دل کا جل گیا آشیاں مری چشم نم ہے دھواں دھواں

اسے ڈھونڈھتا ہوں یہاں وہاں مرے دل کو جس نے جلا دیا

شب و روز اس کا حضور ہے جو سراپا نور ہی نور ہے

اک عجیب کیف و سرور ہے کہ نظر کا جام پلا دیا

ہوا جب بھی وہ مرے روبرو مری آنکھیں کرنے لگیں وضو

تبھی چشم ساجدؔ کم نظر سے حجاب سارے اٹھا دیا