sar-e-rah koi mujhe mila ki naqab ruKH se uTha diya

sar-e-rāh koī mujhe milā ki naqāb ruḳh se uThā diyā

ik ajiib sho.ala-e-husn thā dil-o-jāñ meñ aag lagā diyā

vo taḌaptā mujh ko yuuñ chhoḌ kar mujhe hairatoñ meñ vo Daal kar

vo kidhar se aaya kahāñ gayā na to naam aur na patā diyā

hai ragoñ meñ ḳhuun yā aag hai ye ajiib tarah kī laag hai

vo zabāñ pe ishq kā raag hai ki jo sāz-e-dil ne sikhā diyā

mire dil kā jal gayā āshiyāñ mirī chashm-e-nam hai dhuāñ dhuāñ

use DhūñDhtā huuñ yahāñ vahāñ mire dil ko jis ne jalā diyā

shab-o-roz us kā huzūr hai jo sarāpā nuur hī nuur hai

ik ajiib kaif-o-surūr hai ki nazar kā jaam pilā diyā

huā jab bhī vo mire rū-ba-rū mirī āñkheñ karne lagīñ vuzū

tabhī chashm-e-'sājid'-e-kam-nazar se hijāb saare uThā diyā

sar-e-rah koi mujhe mila ki naqab ruKH se uTha diya

ek ajib shoala-e-husn tha dil-o-jaan mein aag laga diya

wo taDapta mujh ko yun chhoD kar mujhe hairaton mein wo Dal kar

wo kidhar se aaya kahan gaya na to nam aur na pata diya

hai ragon mein KHun ya aag hai ye ajib tarah ki lag hai

wo zaban pe ishq ka rag hai ki jo saz-e-dil ne sikha diya

mere dil ka jal gaya aashiyan meri chashm-e-nam hai dhuan dhuan

use DhunDhta hun yahan wahan mere dil ko jis ne jala diya

shab-o-roz us ka huzur hai jo sarapa nur hi nur hai

ek ajib kaif-o-surur hai ki nazar ka jam pila diya

hua jab bhi wo mere ru-ba-ru meri aankhen karne lagin wuzu

tabhi chashm-e-'sajid'-e-kam-nazar se hijab sare uTha diya