sar-e-sahra-e-jaan hum chaak-damani bhi karte hain

sar-e-sahrā-e-jāñ ham chāk-dāmānī bhī karte haiñ

zarūrat aa paḌe to ret ko paanī bhī karte haiñ

kabhī dariyā uThā laate haiñ apnī TuuTī kashtī meñ

kabhī ik qatra-e-shabnam se tuġhyānī bhī karte haiñ

kabhī aisā ki āñkhoñ meñ nahīñ rakhte haiñ koī ḳhvāb

kabhī yuuñ hai ki ḳhvāboñ kī farāvānī bhī karte haiñ

hamesha aap kā har hukm sar āñkhoñ pe rakhte haiñ

magar ye yaad rakhiyegā ki man-mānī bhī karte haiñ

miyāñ tum dost ban kar jo hamāre saath karte ho

vahī sab kuchh hamāre dushman-e-jānī bhī karte haiñ

ye kyā qātil haiñ, pahle qatl karte haiñ mohabbat kā

phir us ke baa'd iz.hār-e-pashemānī bhī karte haiñ

tujhe tā'mīr kar lenā to ik āsān sā fan hai

rifāqat ke mahal! ham terī darbānī bhī karte haiñ

sar-e-sahra-e-jaan hum chaak-damani bhi karte hain

zarurat aa paDe to ret ko pani bhi karte hain

kabhi dariya uTha late hain apni TuTi kashti mein

kabhi ek qatra-e-shabnam se tughyani bhi karte hain

kabhi aisa ki aankhon mein nahin rakhte hain koi KHwab

kabhi yun hai ki KHwabon ki farawani bhi karte hain

hamesha aap ka har hukm sar aankhon pe rakhte hain

magar ye yaad rakhiyega ki man-mani bhi karte hain

miyan tum dost ban kar jo hamare sath karte ho

wahi sab kuchh hamare dushman-e-jaani bhi karte hain

ye kya qatil hain, pahle qatl karte hain mohabbat ka

phir us ke ba'd izhaar-e-pashemani bhi karte hain

tujhe ta'mir kar lena to ek aasan sa fan hai

rifaqat ke mahal! hum teri darbani bhi karte hain