sar-e-sham usne munh se jo ruKH-e-naqab ulTa

sar-e-shām us ne muñh se jo ruḳh-e-naqāb ulTā

na ġhurūb hone paayā vahīñ āftāb ulTā

jo kisī ne 'qais-o-lailā' use lā ke dī musavvar

na hayā ke maare us ne varaq-e-kitāb ulTā

maiñ hisāb-e-bosa jī meñ kahīñ apne kar rahā thā

vo lagā mujhī se karne talab aur hisāb ulTā

jo haiñ āshnā-e-mashrab vo kisī se hoñ na saa.il

isī vāste rahe hai qadah-e-habāb ulTā

mah-e-chār-dah kā aalam maiñ dikhā.ūñgā falak ko

agar us ne parda muñh se shab-e-māhtāb ulTā

jo ḳhafā huā maiñ jī meñ kisī baat par shab-e-vasl

sahar uTh ke mere aage vahīñ is ne ḳhvāb ulTā

ba-savāl-e-bosa us ne mujhe ruk ke dī jo gaalī

maiñ adab ke maare us ko na diyā javāb ulTā

kahīñ chashm-e-mehr us par to na paḌ ga.ī ho yā rab

jo nikalte sub.h ghar se vo phirā shitāb ulTā

maiñ huā huuñ jis pe āshiq ye shagarf mājrā hai

ki mire ivaz lagā hai use iztirāb ulTā

kisī mast kī lagī hai magar is ke sar ko Thokar

jo paḌā hai mai-kade meñ ye ḳhum-e-sharāb ulTā

ye maqām-e-āfrīñ hai ki ba-zor mus.hafī ne

unhī qāfiyoñ ko phir bhī ba-sad āb-o-tāb ulTā

sar-e-sham us ne munh se jo ruKH-e-naqab ulTa

na ghurub hone paya wahin aaftab ulTa

jo kisi ne 'qais-o-laila' use la ke di musawwar

na haya ke mare us ne waraq-e-kitab ulTa

main hisab-e-bosa ji mein kahin apne kar raha tha

wo laga mujhi se karne talab aur hisab ulTa

jo hain aashna-e-mashrab wo kisi se hon na sail

isi waste rahe hai qadah-e-habab ulTa

mah-e-chaar-dah ka aalam main dikhaunga falak ko

agar us ne parda munh se shab-e-mahtab ulTa

jo KHafa hua main ji mein kisi baat par shab-e-wasl

sahar uTh ke mere aage wahin is ne KHwab ulTa

ba-sawal-e-bosa us ne mujhe ruk ke di jo gali

main adab ke mare us ko na diya jawab ulTa

kahin chashm-e-mehr us par to na paD gai ho ya rab

jo nikalte subh ghar se wo phira shitab ulTa

main hua hun jis pe aashiq ye shagarf majra hai

ki mere iwaz laga hai use iztirab ulTa

kisi mast ki lagi hai magar is ke sar ko Thokar

jo paDa hai mai-kade mein ye KHum-e-sharab ulTa

ye maqam-e-afrin hai ki ba-zor mushafi ne

unhi qafiyon ko phir bhi ba-sad aab-o-tab ulTa