sar-e-taslim KHam karna paDa taqsir se pahle

sar-e-taslīm ḳham karnā paḌā taqsīr se pahle

mohabbat kī sazā mujh ko milī ta.azīr se pahle

burā hogā hamārī raah meñ aayā agar koī

ki ham shamshīr ban jā.eñge ḳhud shamshīr se pahle

mohabbat kī nazar ik ik nafas par kaam kartī hai

tujhe ham dekh lete haiñ tirī tasvīr se pahle

mohabbat kā zamāna bhī ajab dilkash zamāna thā

asīrī merī sābit ho ga.ī zanjīr se pahle

hamāre nāma-e-pur-shauq likhne par ye pābandī

qalam kī jā.eñgī kyā uñgliyāñ tahrīr se pahle

mohabbat kī amānat yūñhī insāñ ne nahīñ paa.ī

kiyā hai ġhaur ḳhud qudrat ne bhī taqdīr se pahle

koī aise meñ bedārī kā de paiġhām ai 'shā.ir'

zamāna hosh meñ aatā nahīñ taqrīr se pahle

sar-e-taslim KHam karna paDa taqsir se pahle

mohabbat ki saza mujh ko mili tazir se pahle

bura hoga hamari rah mein aaya agar koi

ki hum shamshir ban jaenge KHud shamshir se pahle

mohabbat ki nazar ek ek nafas par kaam karti hai

tujhe hum dekh lete hain teri taswir se pahle

mohabbat ka zamana bhi ajab dilkash zamana tha

asiri meri sabit ho gai zanjir se pahle

hamare nama-e-pur-shauq likhne par ye pabandi

qalam ki jaengi kya ungliyan tahrir se pahle

mohabbat ki amanat yunhi insan ne nahin pai

kiya hai ghaur KHud qudrat ne bhi taqdir se pahle

koi aise mein bedari ka de paigham ai 'shair'

zamana hosh mein aata nahin taqrir se pahle