سرکشی جب بھی قلمکار میں آ جاتی ہے

سرکشی جب بھی قلمکار میں آ جاتی ہے

اک مصیبت لئے سرکار میں آ جاتی ہے

جب بغاوت پہ بھی انعام دیے جاتے ہیں

سر جھکائے ہوئے دربار میں آ جاتی ہے

سرخ روئی و بلندی بھی عطا ہوتی ہے

جب شریعت کسی کردار میں آ جاتی ہے

تیری الفت کی قسم ایک ترے آنے سے

زندگی لوٹ کے بیمار میں آ جاتی ہے

شاعری نیند اڑاتی ہے سخن سازوں کی

اور پھر عادت و اطوار میں آ جاتی ہے

جذبۂ عشق ابھرتا ہے زلیخاؤں میں

جستجو مصر کے بازار میں آ جاتی ہے

یہ حکومت کے بکھرنے کا سبب ہے دانشؔ

بے حسی جب کسی سرکار میں آ جاتی ہے