sar kiya zulf ki shab ko to sahar tak pahunche

sar kiyā zulf kī shab ko to sahar tak pahuñche

varna ham log kahāñ husn-e-nazar tak pahuñche

aaj palkoñ pe mirī jashn-e-charāġhāñ hogā

kitne anmol guhar dīda-e-tar tak pahuñche

merī rātoñ kā añdherā bhī duā.eñ degā

ik sitāra jo utar kar mire ghar tak pahuñche

kaun kahtā hai ki ḳhurshīd utar kar aa.e

ek jugnū hī magar ḳhāk-basar tak pahuñche

jo bhī aa.e tire kūche meñ vo jaañ se guzre

sar hathelī pe uThā.e tire dar tak pahuñche

hai usī sāhib-e-me.arāj kā ehsān ki ham

ḳhaak ho kar bhī magar shams-o-qamar tak pahuñche

maiñ añdheroñ kā musāfir huuñ ujāloñ kā naqīb

kis kī jur.at hai mirī gard-e-safar tak pahuñche

uñgliyāñ pahle qalam karnā paḌeñgī 'bābar'

phir ye mumkin hai qalam harf-e-hunar tak pahuñche

sar kiya zulf ki shab ko to sahar tak pahunche

warna hum log kahan husn-e-nazar tak pahunche

aaj palkon pe meri jashn-e-charaghan hoga

kitne anmol guhar dida-e-tar tak pahunche

meri raaton ka andhera bhi duaen dega

ek sitara jo utar kar mere ghar tak pahunche

kaun kahta hai ki KHurshid utar kar aae

ek jugnu hi magar KHak-basar tak pahunche

jo bhi aae tere kuche mein wo jaan se guzre

sar hatheli pe uThae tere dar tak pahunche

hai usi sahib-e-mearaj ka ehsan ki hum

KHak ho kar bhi magar shams-o-qamar tak pahunche

main andheron ka musafir hun ujalon ka naqib

kis ki jurat hai meri gard-e-safar tak pahunche

ungliyan pahle qalam karna paDengi 'babar'

phir ye mumkin hai qalam harf-e-hunar tak pahunche