sar ko bachate ya dar-o-diwar bechte

sar ko bachāte yā dar-o-dīvār bechte

sar kī hifāzatoñ meñ kyā dastār bechte

shohrat ke mol ḳhuub lage shahr meñ magar

ham mohtaram kahāñ the jo kirdār bechte

is kāñptī zamīn ne sab ḳhaak kar diyā

varna ham ārzuoñ ke mīnār bechte

hotā jo iḳhtiyār mire haath meñ to phir

baste ḳharīd laate ye hathiyār bechte

qānūn ko jo 'sīmā' samajh lete aaj ham

to bhuuk aur jahl ke āzār bechte

sar ko bachate ya dar-o-diwar bechte

sar ki hifazaton mein kya dastar bechte

shohrat ke mol KHub lage shahr mein magar

hum mohtaram kahan the jo kirdar bechte

is kanpti zamin ne sab KHak kar diya

warna hum aarzuon ke minar bechte

hota jo iKHtiyar mere hath mein to phir

baste KHarid late ye hathiyar bechte

qanun ko jo 'sima' samajh lete aaj hum

to bhuk aur jahl ke aazar bechte