sar ko hua hai phir wahi sauda-e-zindagi

sar ko huā hai phir vahī saudā-e-zindagī

goyā hai terī yaad masīhā-e-zindagī

kyoñ dam-ba-dam fuzūñ hai tamannā-e-zindagī

shāyad ki ġham huā hai shanāsā-e-zindagī

kartā phir un se kaun taqāzā-e-zindagī

bas ik nazar meñ ho gayā saudā-e-zindagī

ab kis liye ho mujh ko tamanā-e-zindagī

jab tū nahīñ to hech hai duniyā-e-zindagī

vo gardish-e-mudām se ghabrā na jaa.e kyoñ

jis kī umīd-o-bīm meñ kaT jaa.e zindagī

shah pā ke chashm-e-mast kī piinā paḌī mujhe

har-chand tund-o-talḳh thī sahbā-e-zindagī

vo to uḌā ke le ga.ī mujh ko havā-e-shauq

nā-qābil-e-ubūr thā sahrā-e-zindagī

parvāna kar ke himmat-e-mardāna jal-bujhe

phir kyoñ na aisī maut se sharmā.e zindagī

be-ās kar ke chhoḌ ga.ī aarzū to phir

rāhat-fazā-e-ġham huī īzā-e-zindagī

dil meñ vufūr-e-shauq kā tūfāñ liye hue

pī kar chalā huuñ bazm se sahbā-e-zindagī

ab be-kasān-e-shauq kī majbūriyāñ na pūchh

thī munhasir umiid pe ihyā-e-zindagī

ai jabr-e-husn dekh mire bas meñ kyā nahīñ

duniyā ke ġham haiñ aaj muhayyā-e-zindagī

har shauq pā.emāl hai har aarzū tabāh

ab kiije kis umiid pe da.avā-e-zindagī

'sāhir' na jis ko jaur-e-zamāna miTā sakā

vo sharmsār-e-marg huuñ rusvā-e-zindagī

sar ko hua hai phir wahi sauda-e-zindagi

goya hai teri yaad masiha-e-zindagi

kyon dam-ba-dam fuzun hai tamanna-e-zindagi

shayad ki gham hua hai shanasa-e-zindagi

karta phir un se kaun taqaza-e-zindagi

bas ek nazar mein ho gaya sauda-e-zindagi

ab kis liye ho mujh ko tamana-e-zindagi

jab tu nahin to hech hai duniya-e-zindagi

wo gardish-e-mudam se ghabra na jae kyon

jis ki umid-o-bim mein kaT jae zindagi

shah pa ke chashm-e-mast ki pina paDi mujhe

har-chand tund-o-talKH thi sahba-e-zindagi

wo to uDa ke le gai mujh ko hawa-e-shauq

na-qabil-e-ubur tha sahra-e-zindagi

parwana kar ke himmat-e-mardana jal-bujhe

phir kyon na aisi maut se sharmae zindagi

be-as kar ke chhoD gai aarzu to phir

rahat-faza-e-gham hui iza-e-zindagi

dil mein wufur-e-shauq ka tufan liye hue

pi kar chala hun bazm se sahba-e-zindagi

ab be-kasan-e-shauq ki majburiyan na puchh

thi munhasir umid pe ihya-e-zindagi

ai jabr-e-husn dekh mere bas mein kya nahin

duniya ke gham hain aaj muhayya-e-zindagi

har shauq paemal hai har aarzu tabah

ab kije kis umid pe dawa-e-zindagi

'sahir' na jis ko jaur-e-zamana miTa saka

wo sharmsar-e-marg hun ruswa-e-zindagi