sar-mast-e-mai ko dekh ke mat su-e-jam dekh

sar-mast-e-mai ko dekh ke mat sū-e-jām dekh

saaqī pilā usī ko jise tishna-kām dekh

ishve tire haiñ ḳhuub magar ai urūs-e-dahr

jo tujh se be-niyāz haiñ un kā maqām dekh

afzūnī-e-jamāl kā baa.is hai fāsla

farsh-e-zamīñ se jalva-e-māh-e-tamām dekh

kuchh kah rahī haiñ tujh se sitāroñ kī chashmakeñ

chashm-e-yaqīñ se jalva-e-nairang-e-shām dekh

nazzara-e-jahāñ se na de dil ko dāġh-e-rashk

ibrat kī aañkh se ye tamāshā-e-ām dekh

gūñjā kiye kabhī jo navā-hā-e-aish se

kis haal meñ haiñ vo dar-o-dīvār-o-bām dekh

hamdam muhāsba mire a.amāl kā na kar

us ko ḳhudā pe chhoḌ ke merā kalām dekh

sar-mast-e-mai ko dekh ke mat su-e-jam dekh

saqi pila usi ko jise tishna-kaam dekh

ishwe tere hain KHub magar ai urus-e-dahr

jo tujh se be-niyaz hain un ka maqam dekh

afzuni-e-jamal ka bais hai fasla

farsh-e-zamin se jalwa-e-mah-e-tamam dekh

kuchh kah rahi hain tujh se sitaron ki chashmaken

chashm-e-yaqin se jalwa-e-nairang-e-sham dekh

nazzara-e-jahan se na de dil ko dagh-e-rashk

ibrat ki aankh se ye tamasha-e-am dekh

gunja kiye kabhi jo nawa-ha-e-aish se

kis haal mein hain wo dar-o-diwar-o-baam dekh

hamdam muhasba mere aamal ka na kar

us ko KHuda pe chhoD ke mera kalam dekh