sar-mast-e-sharab-e-shauq hai dil

sar-mast-e-sharāb-e-shauq hai dil

yā ḳhud hama-tan hai jām-e-mai dil

bujhtī hī nahīñ hai pyaas is kī

itnā bhī na ho ḳharāb-e-mai dil

husn-e-ruḳh-e-yār se ayaañ hai

sab terā jamāl-e-shauq ai dil

jis ko na tirī talab ho pyāre

aisā bhī jahāñ meñ koī hai dil

kyā aisī paḌī hai is pe uftād

bezār jo zindagī se hai dil

kisī ke ġham-e-hijr meñ shab-o-roz

sar-gashta-o-be-qarār hai dil

kis sāqī-e-māh-vash se chhuT kar

hai jast meñ misl-e-mauj-e-mai dil

kis mutrib-e-ḳhush-navā ke ġham meñ

fariyād-kunāñ hai misl-e-nai dil

ik haal pe misl-e-tab.a-e-jānāñ

tujh ko bhī nahīñ qarār ai dil

ab vasl meñ hijr kī havas hai

hai tū bhī ġharaz ajiib shai dil

hai tere sivā 'jalīl' kā kaun

ai yār-e-vafā-shi.ār ai dil

sar-mast-e-sharab-e-shauq hai dil

ya KHud hama-tan hai jam-e-mai dil

bujhti hi nahin hai pyas is ki

itna bhi na ho KHarab-e-mai dil

husn-e-ruKH-e-yar se ayan hai

sab tera jamal-e-shauq ai dil

jis ko na teri talab ho pyare

aisa bhi jahan mein koi hai dil

kya aisi paDi hai is pe uftad

bezar jo zindagi se hai dil

kisi ke gham-e-hijr mein shab-o-roz

sar-gashta-o-be-qarar hai dil

kis saqi-e-mah-wash se chhuT kar

hai jast mein misl-e-mauj-e-mai dil

kis mutrib-e-KHush-nawa ke gham mein

fariyaad-kunan hai misl-e-nai dil

ek haal pe misl-e-taba-e-jaanan

tujh ko bhi nahin qarar ai dil

ab wasl mein hijr ki hawas hai

hai tu bhi gharaz ajib shai dil

hai tere siwa 'jalil' ka kaun

ai yar-e-wafa-shiar ai dil