sar mein sauda-e-wafa rakhte hain

sar meñ saudā-e-vafā rakhte haiñ

ham bhī is 'ahd meñ kyā rakhte haiñ

vāsta jis kā tire ġham se na ho

ham vo har kaam uThā rakhte haiñ

bin khilī ek kalī pahlū meñ

ham bhī ai bād-e-sabā rakhte haiñ

but-kade vaalo tumheñ kuchh bolo

vo to chup haiñ jo ḳhudā rakhte haiñ

ġhairat-e-ishq koī raah nikāl

zulm vo sab pe ravā rakhte haiñ

kyā salīqa hai sitamgārī kā

ruḳh pe dāmān-e-hayā rakhte haiñ

chāra-sāzān-e-zamāna ai dil

zahr dete haiñ davā rakhte haiñ

naġhma-e-shauq ho yā nāla-e-dil

dard-mandāna sadā rakhte haiñ

dil kī tā'mīr ko Dhā kar 'aḳhtar'

vo mohabbat kī binā rakhte haiñ

sar mein sauda-e-wafa rakhte hain

hum bhi is 'ahd mein kya rakhte hain

wasta jis ka tere gham se na ho

hum wo har kaam uTha rakhte hain

bin khili ek kali pahlu mein

hum bhi ai baad-e-saba rakhte hain

but-kade walo tumhein kuchh bolo

wo to chup hain jo KHuda rakhte hain

ghairat-e-ishq koi rah nikal

zulm wo sab pe rawa rakhte hain

kya saliqa hai sitamgari ka

ruKH pe daman-e-haya rakhte hain

chaara-sazan-e-zamana ai dil

zahr dete hain dawa rakhte hain

naghma-e-shauq ho ya nala-e-dil

dard-mandana sada rakhte hain

dil ki ta'mir ko Dha kar 'aKHtar'

wo mohabbat ki bina rakhte hain