سر میں سودا نظر آتا ہے خدا خیر کرے

سر میں سودا نظر آتا ہے خدا خیر کرے

گھر بھی صحرا نظر آتا ہے خدا خیر کرے

آج بگڑے ہوئے تیور ہیں کچھ ان کے یارو

ہم کو کیا کیا نظر آتا ہے خدا خیر کرے

ہے بلا خیز پھر اک بار تموج دل میں

خوں برستا نظر آتا ہے خدا خیر کرے

ہم سے کہتے ہو اندھیروں کو اجالے سمجھو

شب پرو کیا نظر آتا ہے خدا خیر کرے

آج کیا ان کے تصور میں بہیں گے پھر اشک

غم کا دریا نظر آتا ہے خدا خیر کرے

تھا جگر تشنۂ فریاد تو دم گھٹتا تھا

دل بھی پیاسا نظر آتا ہے خدا خیر کرے

سامنے تھے تو نظر رخ سے نہیں ہٹتی تھی

اب تو پردا نظر آتا ہے خدا خیر کرے

چھوٹ تھی جلوۂ پیہم کی تو اندھیر سا تھا

اب اندھیرا نظر آتا ہے خدا خیر کرے

ہم کو ان سر بہ فلک قصر و عمارات کے گرد

غم کا ڈیرا نظر آتا ہے خدا خیر کرے

نقویٔؔ تشنہ جگر کی بھی بجھے گی کبھی پیاس

اب تو مرتا نظر آتا ہے خدا خیر کرے