sar mein sauda nazar aata hai KHuda KHair kare

sar meñ saudā nazar aatā hai ḳhudā ḳhair kare

ghar bhī sahrā nazar aatā hai ḳhudā ḳhair kare

aaj bigḌe hue tevar haiñ kuchh un ke yaaro

ham ko kyā kyā nazar aatā hai ḳhudā ḳhair kare

hai balā-ḳhez phir ik baar tamavvuj dil meñ

ḳhuuñ barastā nazar aatā hai ḳhudā ḳhair kare

ham se kahte ho añdheroñ ko ujāle samjho

shab-paro kyā nazar aatā hai ḳhudā ḳhair kare

aaj kyā un ke tasavvur meñ baheñge phir ashk

ġham kā dariyā nazar aatā hai ḳhudā ḳhair kare

thā jigar tishna-e-faryād to dam ghuTtā thā

dil bhī pyāsā nazar aatā hai ḳhudā ḳhair kare

sāmne the to nazar ruḳh se nahīñ haTtī thī

ab to pardā nazar aatā hai ḳhudā ḳhair kare

chhūT thī jalva-e-paiham kī to andher sā thā

ab añdherā nazar aatā hai ḳhudā ḳhair kare

ham ko in sar-ba-falak qasr-o-imārāt ke gird

ġham kā Derā nazar aatā hai ḳhudā ḳhair kare

‘naqvī’-e-tishna-jigar kī bhī bujhegī kabhī pyaas

ab to martā nazar aatā hai ḳhudā ḳhair kare

sar mein sauda nazar aata hai KHuda KHair kare

ghar bhi sahra nazar aata hai KHuda KHair kare

aaj bigDe hue tewar hain kuchh un ke yaro

hum ko kya kya nazar aata hai KHuda KHair kare

hai bala-KHez phir ek bar tamawwuj dil mein

KHun barasta nazar aata hai KHuda KHair kare

hum se kahte ho andheron ko ujale samjho

shab-paro kya nazar aata hai KHuda KHair kare

aaj kya un ke tasawwur mein bahenge phir ashk

gham ka dariya nazar aata hai KHuda KHair kare

tha jigar tishna-e-faryaad to dam ghuTta tha

dil bhi pyasa nazar aata hai KHuda KHair kare

samne the to nazar ruKH se nahin haTti thi

ab to parda nazar aata hai KHuda KHair kare

chhuT thi jalwa-e-paiham ki to andher sa tha

ab andhera nazar aata hai KHuda KHair kare

hum ko in sar-ba-falak qasr-o-imaraat ke gird

gham ka Dera nazar aata hai KHuda KHair kare

‘naqwi’-e-tishna-jigar ki bhi bujhegi kabhi pyas

ab to marta nazar aata hai KHuda KHair kare