sar par sat aakash zamin par sat samundar bikhre hain

sar par saat ākāsh zamīñ par saat samundar bikhre haiñ

āñkheñ chhoTī paḌ jaatī haiñ itne manzar bikhre haiñ

zinda rahnā khel nahīñ hai is ābād ḳharābe meñ

vo bhī aksar TuuT gayā hai ham bhī aksar bikhre haiñ

us bastī ke logoñ se jab bāteñ kiiñ to ye jaanā

duniyā bhar ko joḌne vaale andar andar bikhre haiñ

in rātoñ se apnā rishta jaane kaisā rishta hai

nīndeñ kamroñ meñ jaagī haiñ ḳhvāb chhatoñ par bikhre haiñ

āñgan ke ma.asūm shajar ne ek kahānī likkhī hai

itne phal shāḳhoñ pe nahīñ the jitne patthar bikhre haiñ

saarī dhartī saare mausam ek hī jaise lagte haiñ

āñkhoñ āñkhoñ qaid hue the manzar manzar bikhre haiñ

sar par sat aakash zamin par sat samundar bikhre hain

aankhen chhoTi paD jati hain itne manzar bikhre hain

zinda rahna khel nahin hai is aabaad KHarabe mein

wo bhi aksar TuT gaya hai hum bhi aksar bikhre hain

us basti ke logon se jab baaten kin to ye jaana

duniya bhar ko joDne wale andar andar bikhre hain

in raaton se apna rishta jaane kaisa rishta hai

ninden kamron mein jagi hain KHwab chhaton par bikhre hain

aangan ke masum shajar ne ek kahani likkhi hai

itne phal shaKHon pe nahin the jitne patthar bikhre hain

sari dharti sare mausam ek hi jaise lagte hain

aankhon aankhon qaid hue the manzar manzar bikhre hain