sar paTakti rahi dasht-e-gham ki hawa unki yaadon ke jhonke bhi chalte rahe

sar paTaktī rahī dasht-e-ġham kī havā un kī yādoñ ke jhoñke bhī chalte rahe

shaam se tā-sahar ghar kī dahlīz par ham charāġhoñ kī mānind jalte rahe

husn kī dhuup ne zulf kī chhāñv ne nuur ke shahr ne rang ke gaañv ne

har qadam par Thaharne ko āvāz dī ham ko chalnā thā kāñToñ pe chalte rahe

shahr ke moḌ par kal mile the mujhe mere bachpan ke din mere bachpan kī shab

gaahe āñkheñ milīñ gaahe palkeñ jhukīñ gaahe rukte rahe gaahe chalte rahe

kaunsā naam deñ aisī barsāt ko jis ke dāman meñ paanī bhī hai aag bhī

huuk uThtī rahī ruuh jaltī rahī dil pighaltā rahā ashk Dhalte rahe

ek manzil nahīñ ek rasta nahīñ ek dil ek jaañ ek chehra nahīñ

ye naqāboñ kī duniyā ke bahrūpiye bhes lamha-ba-lamha badalte rahe

shahr-dar-shahr ye ḳhāk-o-ḳhūñ kī fazā sochī-samjhī huī ek tahrīk hai

ūñche mahloñ meñ baiThe rahe ahl-e-zar muflisoñ ke makānāt jalte rahe

sar paTakti rahi dasht-e-gham ki hawa un ki yaadon ke jhonke bhi chalte rahe

sham se ta-sahar ghar ki dahliz par hum charaghon ki manind jalte rahe

husn ki dhup ne zulf ki chhanw ne nur ke shahr ne rang ke ganw ne

har qadam par Thaharne ko aawaz di hum ko chalna tha kanTon pe chalte rahe

shahr ke moD par kal mile the mujhe mere bachpan ke din mere bachpan ki shab

gahe aankhen milin gahe palken jhukin gahe rukte rahe gahe chalte rahe

kaunsa nam den aisi barsat ko jis ke daman mein pani bhi hai aag bhi

huk uThti rahi ruh jalti rahi dil pighalta raha ashk Dhalte rahe

ek manzil nahin ek rasta nahin ek dil ek jaan ek chehra nahin

ye naqabon ki duniya ke bahrupiye bhes lamha-ba-lamha badalte rahe

shahr-dar-shahr ye KHak-o-KHun ki faza sochi-samjhi hui ek tahrik hai

unche mahlon mein baiThe rahe ahl-e-zar muflison ke makanat jalte rahe