سر پہ ڈالے ہوئے وہ گرد ملال آتا ہے

سر پہ ڈالے ہوئے وہ گرد ملال آتا ہے

جب اسے میری وفاؤں کا خیال آتا ہے

میں جو چاہوں تو بدل دوں ابھی نظم عالم

کیا کروں تیری مشیت کا خیال آتا ہے

کون ہوتا ہے برے وقت کا ساتھی ہم دم

ایسے عالم میں کسے کس کا خیال آتا ہے

فتنے اٹھ اٹھ کے قدم بوس ہوئے جاتے ہیں

کس قیامت کی وہ چلتے ہوئے چال آتا ہے

کوئی آتا تو ہے تسکین کی خاطر اے دل

وہ نہ آئیں نہ سہی ان کا خیال آتا ہے

ساری دنیا نظر آتی ہے گرامیؔ تاریک

جب مجھے دل کی تباہی کا خیال آتا ہے