sar pe sauda sawar karna tha

sar pe saudā savār karnā thā

ham ko bhī dasht paar karnā thā

pahle sūraj banāte ḳhud ko tum

phir añdheroñ pe vaar karnā thā

gar hunar the tumhāre hāthoñ meñ

sho.ala ko ābshār karnā thā

bādaloñ se yahī ġharaz thī hameñ

apnā saayā farār karnā thā

hijr meñ jaañ gañvāne vaale tujhe

aur kuchh intizār karnā thā

shauq se hī lagāv thā ham ko

shauq hī darkinār karnā thā

itnī vus.at kā kyā karegā vo

āsmāñ kā bichār karnā thā

maut kī sochte rahe 'saritā'

ziist ko yādgār karnā thā

sar pe sauda sawar karna tha

hum ko bhi dasht par karna tha

pahle suraj banate KHud ko tum

phir andheron pe war karna tha

gar hunar the tumhaare hathon mein

shoala ko aabshaar karna tha

baadalon se yahi gharaz thi hamein

apna saya farar karna tha

hijr mein jaan ganwane wale tujhe

aur kuchh intizar karna tha

shauq se hi lagaw tha hum ko

shauq hi darkinar karna tha

itni wusat ka kya karega wo

aasman ka bichaar karna tha

maut ki sochte rahe 'sarita'

zist ko yaadgar karna tha