sar-phire karne lage hain jazb soz-e-dil ki baat

sar-phire karne lage haiñ jazb soz-e-dil kī baat

ab ḳhudā rakkhe to rakkhe aap kī mahfil kī baat

qāfile vaalo ab aao aur aage baḌh chaleñ

khā chuke rahbar kā dhokā jaan lī manzil kī baat

kitnī nafrat ho rahī hai sūrat-e-sāhil se ab

kitnī hasrat se kiyā karte the ham sāhil kī baat

ho ke barham uThne vaale haiñ vo saare tishna-lab

aa.ī hai hisse meñ jin ke sāqi-e-mahfil kī baat

ḳhud hī ab raushan kareñge apne ġham-ḳhāne ko ham

dekh lī taaro tumhārī sa.i-e-lā-hāsil kī baat

saare ammāl-e-hukūmat mujh se bad-zan ho ga.e

kar rahā thā ek din maiñ bismil-o-qātil kī baat

soch ai 'nāzish' na ho ye bhī farārī zehniyat

kar rahā hai ahd-e-hāzir meñ jo mustaqbil kī baat

sar-phire karne lage hain jazb soz-e-dil ki baat

ab KHuda rakkhe to rakkhe aap ki mahfil ki baat

qafile walo ab aao aur aage baDh chalen

kha chuke rahbar ka dhoka jaan li manzil ki baat

kitni nafrat ho rahi hai surat-e-sahil se ab

kitni hasrat se kiya karte the hum sahil ki baat

ho ke barham uThne wale hain wo sare tishna-lab

aai hai hisse mein jin ke saqi-e-mahfil ki baat

KHud hi ab raushan karenge apne gham-KHane ko hum

dekh li taro tumhaari sai-e-la-hasil ki baat

sare ammal-e-hukumat mujh se bad-zan ho gae

kar raha tha ek din main bismil-o-qatil ki baat

soch ai 'nazish' na ho ye bhi farari zehniyat

kar raha hai ahd-e-hazir mein jo mustaqbil ki baat