sar-phiri pagal hawa ka tez jhonka aaega

sar-phirī pāgal havā kā tez jhoñkā aa.egā

hasratoñ ke ḳhushk pattoñ ko uḌā le jā.egā

dūdhiyā ākāsh meñ kis ko sadā detā hai tū

tere maazī kā parinda ab na vāpas aa.egā

chhoTī chhoTī ḳhvāhishoñ kā qatl hote dekh kar

umr kā ehsās ruḳh par gard ban ke chhā.egā

vaqt us se chhīn legā ḳhud-pasandī kā ġhurūr

haañ yaqīnan vo ḳhudā ban kar bahut pachhtā.egā

vo hai sar-tā-pā mujassam ik francisi sharāb

nashsha ban kar jism us kā zehn par bhī chhā.egā

ḳhvāhishoñ ke jañgaloñ meñ lazzatoñ ke peḌ haiñ

jin ke saa.e meñ musāfir der tak sustā.egā

aap apnī aag meñ ham haath tāpeñge 'adīb'

jab december saath apne barf-bārī lā.egā

sar-phiri pagal hawa ka tez jhonka aaega

hasraton ke KHushk patton ko uDa le jaega

dudhiya aakash mein kis ko sada deta hai tu

tere mazi ka parinda ab na wapas aaega

chhoTi chhoTi KHwahishon ka qatl hote dekh kar

umr ka ehsas ruKH par gard ban ke chhaega

waqt us se chhin lega KHud-pasandi ka ghurur

han yaqinan wo KHuda ban kar bahut pachhtaega

wo hai sar-ta-pa mujassam ek francisi sharab

nashsha ban kar jism us ka zehn par bhi chhaega

KHwahishon ke jangalon mein lazzaton ke peD hain

jin ke sae mein musafir der tak sustaega

aap apni aag mein hum hath tapenge 'adib'

jab december sath apne barf-bari laega