sar se panw talak hawa hun main

sar se paañv talak havā huuñ maiñ

chaltī phirtī huī ḳhalā huuñ maiñ

merā apnā koī vajūd nahīñ

ahd-e-māzī kā silsila huuñ maiñ

maiñ koī aur huuñ ki maiñ hī huuñ

soch meñ paḌ ga.ī huuñ kyā huuñ maiñ

ruknā chāhūñ to ek manzil huuñ

chalnā chāhūñ to rāsta huuñ maiñ

kaun sun pā.egā bhalā mujh ko

ik bahut duur kī sadā huuñ maiñ

miT chukī kab kī vo mirī hastī

ho chukā jo vo hādisa huuñ maiñ

soch kar dekhiye mirī vahshat

qaid huuñ but meñ aur ḳhudā huuñ maiñ

sar se panw talak hawa hun main

chalti phirti hui KHala hun main

mera apna koi wajud nahin

ahd-e-mazi ka silsila hun main

main koi aur hun ki main hi hun

soch mein paD gai hun kya hun main

rukna chahun to ek manzil hun

chalna chahun to rasta hun main

kaun sun paega bhala mujh ko

ek bahut dur ki sada hun main

miT chuki kab ki wo meri hasti

ho chuka jo wo hadisa hun main

soch kar dekhiye meri wahshat

qaid hun but mein aur KHuda hun main