sar subuk-bari se koi dar pe KHam hone ko hai

sar subuk-bārī se koī dar pe ḳham hone ko hai

ḳhaak kā putlā hai zer-e-ḳhāk zam hone ko hai

ek sahrā jo namī kī jins se vāqif nahīñ

mere ashkoñ kī farāvānī se nam hone ko hai

āsmānoñ se sadā.eñ aa rahī haiñ dam-ba-dam

mo'jiza hone ko hai ab koī dam hone ko hai

'arsh mahv-e-yās hai aur kah rahā hai ik malak

qadd-e-ādam ghaT chukā hai aur kam hone ko hai

ik surōrī kaifiyat yaksar maza detī nahīñ

jo ḳhushī kal tak ḳhushī thī aaj ġham hone ko hai

kyā bahār-o-ḳhushk-sālī kyā 'urūj aur kyā zavāl

kal zamīn-o-āsmāñ mujh ko baham hone ko hai

kar diye mismār maiñ ne sab butān-e-āzarī

but-kada ab aan meñ misl-e-haram hone ko hai

matla'-e-hastī ġhubār-ālūd thā kyoñ saaf hai

dil mukarrar kah rahā chashm-e-karam hone ko hai

ik nazar us samt dekho hāl-e-duniyā jaan lo

āñkh-pyāla piir kā ab jām-e-jam hone ko hai

ai faqīhān-e-haram ai muftiyān-e-kaj-ravish

bul-havas jo kal thā ab vo mohtaram hone ko hai

sar subuk-bari se koi dar pe KHam hone ko hai

KHak ka putla hai zer-e-KHak zam hone ko hai

ek sahra jo nami ki jins se waqif nahin

mere ashkon ki farawani se nam hone ko hai

aasmanon se sadaen aa rahi hain dam-ba-dam

mo'jiza hone ko hai ab koi dam hone ko hai

'arsh mahw-e-yas hai aur kah raha hai ek malak

qadd-e-adam ghaT chuka hai aur kam hone ko hai

ek suroori kaifiyat yaksar maza deti nahin

jo KHushi kal tak KHushi thi aaj gham hone ko hai

kya bahaar-o-KHushk-sali kya 'uruj aur kya zawal

kal zamin-o-asman mujh ko baham hone ko hai

kar diye mismar main ne sab butan-e-azari

but-kada ab aan mein misl-e-haram hone ko hai

matla'-e-hasti ghubar-alud tha kyon saf hai

dil mukarrar kah raha chashm-e-karam hone ko hai

ek nazar us samt dekho haal-e-duniya jaan lo

aankh-pyala pir ka ab jam-e-jam hone ko hai

ai faqihan-e-haram ai muftiyan-e-kaj-rawish

bul-hawas jo kal tha ab wo mohtaram hone ko hai