sar uThaegi agar rasm-e-jafa mere baad

sar uThā.egī agar rasm-e-jafā mere baa'd

mujh ko DhūñDegā mirā dasht-e-anā mere baa'd

apnī āvāz kī sūrat meñ rahūñgā zinda

mere parcham ko uḌā.egī havā mere baa'd

apne kūche se chale jaane pe majbūr na kar

kis se pūchhegā koī terā pata mere baa'd

itnī ummīd to hai apne pisar se mujh ko

merī turbat pe jalā.egā diyā mere baa'd

'ishq duniyā pe 'ināyāt kiye jaatā hai

kis ko karne haiñ ye sab qarz adā mere baa'd

phuul sahrā meñ khilā.e haiñ 'munavvar' maiñ ne

taaki mahkī rahe kuchh der fazā mere baa'd

sar uThaegi agar rasm-e-jafa mere ba'd

mujh ko DhunDega mera dasht-e-ana mere ba'd

apni aawaz ki surat mein rahunga zinda

mere parcham ko uDaegi hawa mere ba'd

apne kuche se chale jaane pe majbur na kar

kis se puchhega koi tera pata mere ba'd

itni ummid to hai apne pisar se mujh ko

meri turbat pe jalaega diya mere ba'd

'ishq duniya pe 'inayat kiye jata hai

kis ko karne hain ye sab qarz ada mere ba'd

phul sahra mein khilae hain 'munawwar' main ne

taki mahki rahe kuchh der faza mere ba'd