sarab-e-shab bhi hai KHwab-e-shikasta-pa bhi hai

sarāb-e-shab bhī hai ḳhvāb-e-shikasta-pā bhī hai

ki niiñd māñgte rahne kī kuchh sazā bhī hai

tamām umr chunūñgī maiñ reza reza tujhe

pas-e-ġhubār-e-nigah ek ā.īna bhī hai

supurd-e-raqs kiyā maiñ ne har tamannā ko

lahū ke shor kī ab koī intihā bhī hai

maiñ kyuuñ na ek hī qatre se sair ho jā.ūñ

kisī kī pyaas ko dariyā kabhī milā bhī hai

miyān-e-rāh kaḌī dhuup meñ na chhoḌ mujhe

batā to de ki kahīñ ghar kā rāsta bhī hai

maiñ is charāġh ko dushman kī saf meñ kyuuñ rakhkhūñ

ye mere naam pe kuchh der ko jalā bhī hai

hazār lazzat-e-ḳhāmosh ke nashe meñ ho dil

suḳhan ke naam pe kuchh harf māñgtā bhī hai

mire ḳhilāf gavāhoñ kī kuchh kamī bhī nahīñ

magar har ek mire haq meñ boltā bhī hai

simaT ke rah ga.e dīvār-e-shahr-e-ḳhauf meñ log

kise ḳhabar ho ki zinda koī bachā bhī hai

hujūm-e-tishna-labāñ kā surāġh de mujh ko

virāsatoñ meñ mirī dasht-e-karbalā bhī hai

sarab-e-shab bhi hai KHwab-e-shikasta-pa bhi hai

ki nind mangte rahne ki kuchh saza bhi hai

tamam umr chunungi main reza reza tujhe

pas-e-ghubar-e-nigah ek aaina bhi hai

supurd-e-raqs kiya main ne har tamanna ko

lahu ke shor ki ab koi intiha bhi hai

main kyun na ek hi qatre se sair ho jaun

kisi ki pyas ko dariya kabhi mila bhi hai

miyan-e-rah kaDi dhup mein na chhoD mujhe

bata to de ki kahin ghar ka rasta bhi hai

main is charagh ko dushman ki saf mein kyun rakhkhun

ye mere nam pe kuchh der ko jala bhi hai

hazar lazzat-e-KHamosh ke nashe mein ho dil

suKHan ke nam pe kuchh harf mangta bhi hai

mere KHilaf gawahon ki kuchh kami bhi nahin

magar har ek mere haq mein bolta bhi hai

simaT ke rah gae diwar-e-shahr-e-KHauf mein log

kise KHabar ho ki zinda koi bacha bhi hai

hujum-e-tishna-laban ka suragh de mujh ko

wirasaton mein meri dasht-e-karbala bhi hai