sarapa bagh tu ai gul-badan hai

sarāpā baaġh tū ai gul-badan hai

sanobar-qad hai aur ġhuncha-dahan hai

javāhir-ḳhāna us but kā dahan hai

guhar dandāñ haiñ lab la.al-e-yaman hai

agar yūñhī rahī soz-e-mohabbat

to ik din ḳhaak apnā qasr-e-tan hai

nahīñ dil gesū-e-shab-gūñ meñ tere

sitamgar saañp ke muñh meñ ye man hai

vo sīdhī baat bhī karte nahīñ ab

nahīñ ma.alūm ye kyā bāñkpan hai

mirī taqdīr kā chakkar hai ye bhī

tujhe gardish jo ai charḳh-e-kuhan hai

do-rangī-e-falak is se hai sābit

koī giryāñ hai koī ḳhanda-zan hai

tamannā-e-shahādat kyā bar aa.e

mirā qātil but-e-nāzuk-badan hai

vo ka.abe meñ bhī hai but-ḳhāne meñ bhī

muqarrar har jagah jalva-fagan hai

bharosa us ke qaul-o-fe.al kā kyā

vo but be-mehr hai va.ada-shikan hai

parī-rūoñ ko dil dete ho 'sābir'

ye nādānī hai ye dīvāna-pan hai

sarapa bagh tu ai gul-badan hai

sanobar-qad hai aur ghuncha-dahan hai

jawahir-KHana us but ka dahan hai

guhar dandan hain lab lal-e-yaman hai

agar yunhi rahi soz-e-mohabbat

to ek din KHak apna qasr-e-tan hai

nahin dil gesu-e-shab-gun mein tere

sitamgar sanp ke munh mein ye man hai

wo sidhi baat bhi karte nahin ab

nahin malum ye kya bankpan hai

meri taqdir ka chakkar hai ye bhi

tujhe gardish jo ai charKH-e-kuhan hai

do-rangi-e-falak is se hai sabit

koi giryan hai koi KHanda-zan hai

tamanna-e-shahadat kya bar aae

mera qatil but-e-nazuk-badan hai

wo kabe mein bhi hai but-KHane mein bhi

muqarrar har jagah jalwa-fagan hai

bharosa us ke qaul-o-feal ka kya

wo but be-mehr hai wada-shikan hai

pari-ruon ko dil dete ho 'sabir'

ye nadani hai ye diwana-pan hai