sarapa chashm-e-pur-nam ban gae hain

sarāpā chashm-e-pur-nam ban ga.e haiñ

gunahgāroñ se aadam ban ga.e haiñ

mu'allaq the jo mustaqbil meñ lamhe

vo ab taqdīr-e-mubram ban ga.e haiñ

mohabbat ke qadam jin par paḌe the

vo patthar āb-e-zamzam ban ga.e haiñ

kamāl-e-vasl the jo chand lamhe

abhī ik ḳhvāb-e-mub.ham ban ga.e haiñ

tumhāre lams meñ jaadū hai kaisā

hamāre zaḳhm marham ban ga.e haiñ

sar-e-taslīm ḳham jab kar liyā hai

jo chāhā aap ne ham ban ga.e haiñ

hamāre chāk-e-dāman se 'hidāyat'

junūñ ke laakh parcham ban ga.e haiñ

sarapa chashm-e-pur-nam ban gae hain

gunahgaron se aadam ban gae hain

mu'allaq the jo mustaqbil mein lamhe

wo ab taqdir-e-mubram ban gae hain

mohabbat ke qadam jin par paDe the

wo patthar aab-e-zamzam ban gae hain

kamal-e-wasl the jo chand lamhe

abhi ek KHwab-e-mubham ban gae hain

tumhaare lams mein jadu hai kaisa

hamare zaKHm marham ban gae hain

sar-e-taslim KHam jab kar liya hai

jo chaha aap ne hum ban gae hain

hamare chaak-e-daman se 'hidayat'

junun ke lakh parcham ban gae hain