sard hain dil aatish-e-ru-e-nigaran chahiye

sard haiñ dil ātish-e-rū-e-nigārāñ chāhiye

sho.ala-rañg-e-bahār-e-gul-ezārāñ chāhiye

manzil-e-ishq-o-junūñ ke fāsle haiñ sar-ba-kaf

in kaThin rāhoñ meñ lutf-e-dast-e-yārāñ chāhiye

kaT rahī hai aur kaT chuktī nahīñ fasl-e-ḳhizāñ

tez-tar ik aur teġh-e-nau-bahārāñ chāhiye

aaj mai-ḳhāne meñ sehr-e-chashm-e-sāqī ke liye

iltifāt-e-chashm mast-e-mai-gusārāñ chāhiye

is dil-e-vahshī kī āzādī kā kyā kiije ilaaj

ik kamand-e-gesū-e-yazdāñ-shikārāñ chāhiye

naġhma ban jaatā hai naala un kī bazm-e-nāz meñ

un ko ḳhush rakhne ko shor-e-sogvārāñ chāhiye

āsmānoñ se baraste haiñ zamīñ par regzār

aaj phir 'sardār' raqs-e-barq-o-bārāñ chāhiye

sard hain dil aatish-e-ru-e-nigaran chahiye

shoala-rang-e-bahaar-e-gul-ezaran chahiye

manzil-e-ishq-o-junun ke fasle hain sar-ba-kaf

in kaThin rahon mein lutf-e-dast-e-yaran chahiye

kaT rahi hai aur kaT chukti nahin fasl-e-KHizan

tez-tar ek aur tegh-e-nau-bahaaran chahiye

aaj mai-KHane mein sehr-e-chashm-e-saqi ke liye

iltifat-e-chashm mast-e-mai-gusaran chahiye

is dil-e-wahshi ki aazadi ka kya kije ilaj

ek kamand-e-gesu-e-yazdan-shikaran chahiye

naghma ban jata hai nala un ki bazm-e-naz mein

un ko KHush rakhne ko shor-e-sogwaran chahiye

aasmanon se baraste hain zamin par regzar

aaj phir 'sardar' raqs-e-barq-o-baran chahiye