sardi-o-garmi-o-barsat mein aa jata hai

sardī-o-garmī-o-barsāt meñ aa jaatā hai

mujh se milne vo mazāfāt meñ aa jaatā hai

fasl-e-gul aane pe ho jaatī hai vīrānī duur

dil ḳharābe se ḳharābāt meñ aa jaatā hai

kabhī dānista adā ho kabhī nā-dānista

naam terā mirī har baat meñ aa jaatā hai

jism kī nashv-o-numā sūrat-e-ashiyā-e-zamīñ

rū-e-ḳhūbāñ falakiyyāt meñ aa jaatā hai

ishq kā sabr-o-tahammul hī se qaa.em hai vaqār

naala fariyād ḳhurāfāt meñ aa jaatā hai

ḳhidmat-e-ḳhalq se hotī hai ḳhudā kī ḳhidmat

ishq maḳhlūq-e-ibādāt meñ aa jaatā hai

banda ho jaatā hai jab ḳhūgar-e-mushkil 'ābid'

zā.iqa talḳhī-e-hālāt meñ aa jaatā hai

sardi-o-garmi-o-barsat mein aa jata hai

mujh se milne wo mazafat mein aa jata hai

fasl-e-gul aane pe ho jati hai virani dur

dil KHarabe se KHarabaat mein aa jata hai

kabhi danista ada ho kabhi na-danista

nam tera meri har baat mein aa jata hai

jism ki nashw-o-numa surat-e-ashiya-e-zamin

ru-e-KHuban falakiyyat mein aa jata hai

ishq ka sabr-o-tahammul hi se qaem hai waqar

nala fariyaad KHurafat mein aa jata hai

KHidmat-e-KHalq se hoti hai KHuda ki KHidmat

ishq maKHluq-e-ibaadat mein aa jata hai

banda ho jata hai jab KHugar-e-mushkil 'abid'

zaiqa talKHi-e-haalat mein aa jata hai