sarguzisht-e-dil ko rudad-e-jahan samjha tha main

sarguzisht-e-dil ko rūdād-e-jahāñ samjhā thā maiñ

muḳhtasar sī baat ko ik dāstāñ samjhā thā maiñ

ban ga.ī mere liye ik iztirāb-e-mustaqil

jis mohabbat ko sukūn-e-qalb-o-jāñ samjhā thā maiñ

vo bhī merī gardish-e-taqdīr kā ik daur thā

jis ko ab tak inqilāb-e-āsmāñ samjhā thā maiñ

vo to ye kahiye mohabbat ne hī āñkheñ khol diiñ

zindagī ko varna ik rāz-e-nihāñ samjhā thā maiñ

rashk rah rah kar na kyuuñ aa.e nasīb-e-ġhair par

vo usī mahfil meñ shāmil the jahāñ samjhā thā maiñ

thā haram kī sarzamīñ par lutf-andoz-e-sujūd

ya.anī ka.abe ko tumhārā āstāñ samjhā thā maiñ

vādi-e-ġhurbat meñ yuuñ gum-karda manzil thā 'shakīl'

rahzan-e-manzil ko ḳhizr-e-kārvāñ samjhā thā maiñ

sarguzisht-e-dil ko rudad-e-jahan samjha tha main

muKHtasar si baat ko ek dastan samjha tha main

ban gai mere liye ek iztirab-e-mustaqil

jis mohabbat ko sukun-e-qalb-o-jaan samjha tha main

wo bhi meri gardish-e-taqdir ka ek daur tha

jis ko ab tak inqilab-e-asman samjha tha main

wo to ye kahiye mohabbat ne hi aankhen khol din

zindagi ko warna ek raaz-e-nihan samjha tha main

rashk rah rah kar na kyun aae nasib-e-ghair par

wo usi mahfil mein shamil the jahan samjha tha main

tha haram ki sarzamin par lutf-andoz-e-sujud

yani kabe ko tumhaara aastan samjha tha main

wadi-e-ghurbat mein yun gum-karda manzil tha 'shakil'

rahzan-e-manzil ko KHizr-e-karwan samjha tha main