sarguzisht-e-gham ko mohtaj-e-bayan pata hun main

sarguzisht-e-ġham ko mohtāj-e-bayāñ paatā huuñ maiñ

kyoñ zabān-e-shauq ko ab be-zabāñ paatā huuñ maiñ

hai vahī kaifiyyat-e-be-tābī-e-mauj-e-nazar

husn ke jalvoñ ko bahr-e-bekarāñ paatā huuñ maiñ

dāstān-e-ishq merī zīnat-e-kaun-o-makāñ

jis ke kuchh TukḌe yahāñ aur kuchh vahāñ paatā huuñ maiñ

ishq ban kar kholtā huuñ husn ke sar-basta raaz

fitrat-e-ālam kā ḳhud ko tarjumāñ paatā huuñ maiñ

apnī hastī kā mujhe ehsās jab se ho chalā

sar ko apne dosh par bār-e-garāñ paatā huuñ maiñ

har shikast-e-ārzū hai tāza-tar tamhīd-e-shauq

aur kuchh ab apnī himmat ko javāñ paatā huuñ maiñ

ḳhizr-e-rah bantā chalā har sang-e-zer-e-pā mirā

Thokareñ khā khā ke manzil kā nishāñ paatā huuñ maiñ

māvarā-e-qaid-e-rang-o-bū hai imkān-e-nigāh

dāman-e-sahrā meñ husn-e-gulsitāñ paatā huuñ maiñ

kis qadar ūñchī hai 'najmī' merī parvāz-e-ḳhayāl

har zamīn-e-sher ko ab āsmāñ paatā huuñ maiñ

sarguzisht-e-gham ko mohtaj-e-bayan pata hun main

kyon zaban-e-shauq ko ab be-zaban pata hun main

hai wahi kaifiyyat-e-be-tabi-e-mauj-e-nazar

husn ke jalwon ko bahr-e-bekaran pata hun main

dastan-e-ishq meri zinat-e-kaun-o-makan

jis ke kuchh TukDe yahan aur kuchh wahan pata hun main

ishq ban kar kholta hun husn ke sar-basta raaz

fitrat-e-alam ka KHud ko tarjuman pata hun main

apni hasti ka mujhe ehsas jab se ho chala

sar ko apne dosh par bar-e-garan pata hun main

har shikast-e-arzu hai taza-tar tamhid-e-shauq

aur kuchh ab apni himmat ko jawan pata hun main

KHizr-e-rah banta chala har sang-e-zer-e-pa mera

Thokaren kha kha ke manzil ka nishan pata hun main

mawara-e-qaid-e-rang-o-bu hai imkan-e-nigah

daman-e-sahra mein husn-e-gulsitan pata hun main

kis qadar unchi hai 'najmi' meri parwaz-e-KHayal

har zamin-e-sher ko ab aasman pata hun main