sarishk-e-gham simaT kar dil ke armanon ko le Dube

sarishk-e-ġham simaT kar dil ke armānoñ ko le Duube

ye sāhab-ḳhāna apne saath mehmānoñ ko le Duube

dikhā kar ḳhvāb-e-ḳhush-ā.inda firdaus-ḳhayālī ke

na.e shaddād ham mā'sūm insānoñ ko le Duube

banāte rah ga.e tanzīm-e-nau ke barhaman ḳhāke

butoñ ke hausle tab tak sanam-ḳhānoñ ko le Duube

na jaane kah diyā shabnam ne kyā āñkhoñ hī āñkhoñ meñ

ki ġhunche thartharā.e aur gulistānoñ ko le Duube

ḳhumār-e-chashm-e-sāqī is qadar tauba-shikan tauba

ye do sāġhar na jaane kitne paimānoñ ko le Duube

sahar hone se pahle aisī ik añgḌā.ī ai saaqī

jo paimānoñ se ubhre aur mai-ḳhānoñ ko le Duube

fazāoñ ko umīd-e-rañg-o-bū thī jin se ai 'arshad'

vo ġhunche aaj khilte hī gulistānoñ ko le Duube

sarishk-e-gham simaT kar dil ke armanon ko le Dube

ye sahab-KHana apne sath mehmanon ko le Dube

dikha kar KHwab-e-KHush-ainda firdaus-KHayali ke

nae shaddad hum ma'sum insanon ko le Dube

banate rah gae tanzim-e-nau ke barhaman KHake

buton ke hausle tab tak sanam-KHanon ko le Dube

na jaane kah diya shabnam ne kya aankhon hi aankhon mein

ki ghunche thartharae aur gulistanon ko le Dube

KHumar-e-chashm-e-saqi is qadar tauba-shikan tauba

ye do saghar na jaane kitne paimanon ko le Dube

sahar hone se pahle aisi ek angDai ai saqi

jo paimanon se ubhre aur mai-KHanon ko le Dube

fazaon ko umid-e-rang-o-bu thi jin se ai 'arshad'

wo ghunche aaj khilte hi gulistanon ko le Dube