sarisht-e-husn ka jalwa dikhae deta hai

sarisht-e-husn kā jalva dikhā.e detā hai

bhañvar ke biich bichhaḌne kī raa.e detā hai

tirī hañsī meñ vo sehr-e-ġhinā-e-mutrib hai

mirī fuġhāñ ko jo naġhma banā.e detā hai

kamāl-e-mā'rifat-e-'ishq kī bulandī par

ye kaun parda-e-ġhaibat uThā.e detā hai

usī ne husn-e-samā'at tumheñ diyā hogā

vahī jo ham ko suḳhanvar banā.e detā hai

ye kaisā shor-e-ḳhamoshī hai andarūñ mere

jo mere kaan ke parde uḌaa.e detā hai

vo merī ruuh kī takmīl kar chukā hai to phir

badan ye kis ko sadā.eñ lagā.e detā hai

tujhe ḳhabar hai unhīñ ke haiñ kausar-o-tasnīm

tū jin kī pyaas pe pahre biThā.e detā hai

qasīm-e-'ishq hai ulfat luTā luTā ke 'safar'

vujūd-e-nutfa-e-shar ko miTā.e detā hai

sarisht-e-husn ka jalwa dikhae deta hai

bhanwar ke bich bichhaDne ki rae deta hai

teri hansi mein wo sehr-e-ghina-e-mutrib hai

meri fughan ko jo naghma banae deta hai

kamal-e-ma'rifat-e-'ishq ki bulandi par

ye kaun parda-e-ghaibat uThae deta hai

usi ne husn-e-sama'at tumhein diya hoga

wahi jo hum ko suKHanwar banae deta hai

ye kaisa shor-e-KHamoshi hai andarun mere

jo mere kan ke parde uDae deta hai

wo meri ruh ki takmil kar chuka hai to phir

badan ye kis ko sadaen lagae deta hai

tujhe KHabar hai unhin ke hain kausar-o-tasnim

tu jin ki pyas pe pahre biThae deta hai

qasim-e-'ishq hai ulfat luTa luTa ke 'safar'

wujud-e-nutfa-e-shar ko miTae deta hai