سرشت حسن کا جلوہ دکھائے دیتا ہے

سرشت حسن کا جلوہ دکھائے دیتا ہے

بھنور کے بیچ بچھڑنے کی رائے دیتا ہے

تری ہنسی میں وہ سحر غنائے مطرب ہے

مری فغاں کو جو نغمہ بنائے دیتا ہے

کمال معرفت عشق کی بلندی پر

یہ کون پردۂ غیبت اٹھائے دیتا ہے

اسی نے حسن سماعت تمہیں دیا ہوگا

وہی جو ہم کو سخنور بنائے دیتا ہے

یہ کیسا شور خموشی ہے اندروں میرے

جو میرے کان کے پردے اڑائے دیتا ہے

وہ میری روح کی تکمیل کر چکا ہے تو پھر

بدن یہ کس کو صدائیں لگائے دیتا ہے

تجھے خبر ہے انہیں کے ہیں کوثر و تسنیم

تو جن کی پیاس پہ پہرے بٹھائے دیتا ہے

قسیم عشق ہے الفت لٹا لٹا کے سفرؔ

وجود نطفۂ شر کو مٹائے دیتا ہے