سر خوشی جیت کی یوںہی نہیں طاری ہوئی ہے

سر خوشی جیت کی یوںہی نہیں طاری ہوئی ہے

کھل گیا مجھ پہ یہ بازی تری ہاری ہوئی ہے

گزرے کل تک جو لگا کرتی تھی پھولوں جیسی

آج وہ زیست مری جان پہ بھاری ہوئی ہے

چاندنی رات ہوا پھول ستارے جگنو

دیکھ سب دل کے لئے کارگزاری ہوئی ہے

دشت احساس کوئی تشنگی طاری ہے مگر

یہ مری سانس جو ہر پیاس سے عاری ہوئی ہے

ہر غزل اور فسانے میں ہے چرچا جس کا

میں نے وہ شام ترے ساتھ گزاری ہوئی ہے

دشمن جاں بھی وہی اور مری جاں بھی وہی

اس کی یادوں سے ہر اک رات سنواری ہوئی ہے

آج یادوں کی گھٹا ٹوٹ کے برسی ہے غزلؔ

اک اداسی ہے جو پھر شام سے طاری ہوئی ہے