سرسبز ہیں کبھی تو کبھی ہیں صلیب رنگ

سرسبز ہیں کبھی تو کبھی ہیں صلیب رنگ

آنکھوں کے ارد گرد میں کیا کیا عجیب رنگ

فطرت کھلی تو لگنے لگے سب رقیب رنگ

چہرے دکھائی دیتے تھے جن کے حبیب رنگ

تیری فسردگی کی خبر عام کیا ہوئی

آئے نہ بھول کر بھی چمن کے قریب رنگ

ہے کب سے انتظار میں اک سر بریدہ شاخ

کس دن جگانے آئیں گے اس کا نصیب رنگ

بکھرے ہیں دور دور تلک نقش رات کے

ظلمت میں کھو گئے ہیں سحر کے نقیب رنگ

بے چہرگی کا شوق مبارک ہو آپ کو

رہنے دیں میرے پاس مرے بد نصیب رنگ