sarsari bhi hai kargar bhi hai

sarsarī bhī hai kārgar bhī hai

ye kaTārī bhī hai nazar bhī hai

kise taakā kise kiyā bismil

o kamāñ-dār kuchh ḳhabar bhī hai

kaun kahtā hai gul nahīñ sunte

āh-e-bulbul meñ kuchh asar bhī hai

go mirī dāstāñ hai tuul bahut

tum suno to ye muḳhtasar bhī hai

majma'-ul-barzaḳhain hai insān

ye farishta bhī hai bashar bhī hai

nazr hai jo pasand aa.e tumheñ

dil bhī maujūd hai jigar bhī hai

vaar terī nigah kā roke kaun

kahīñ us teġh kī sipar bhī hai

ye bhī ḳhidmat meñ sar buland rahe

ā.ina-dār ik qamar bhī hai

un ke va.adoñ kā kuchh yaqīn nahīñ

guftugū meñ agar magar bhī hai

ġhair ne teġh par gila na dharā

koī merā sā be-jigar bhī hai

ġhair kyā ma.arke meñ ā.eñge

buz-diloñ kā yahāñ guzar bhī hai

uTTho 'akbar' chalo madīne ko

is se behtar koī safar bhī hai

sarsari bhi hai kargar bhi hai

ye kaTari bhi hai nazar bhi hai

kise taka kise kiya bismil

o kaman-dar kuchh KHabar bhi hai

kaun kahta hai gul nahin sunte

aah-e-bulbul mein kuchh asar bhi hai

go meri dastan hai tul bahut

tum suno to ye muKHtasar bhi hai

majma'-ul-barzaKHain hai insan

ye farishta bhi hai bashar bhi hai

nazr hai jo pasand aae tumhein

dil bhi maujud hai jigar bhi hai

war teri nigah ka roke kaun

kahin us tegh ki sipar bhi hai

ye bhi KHidmat mein sar buland rahe

aaina-dar ek qamar bhi hai

un ke wadon ka kuchh yaqin nahin

guftugu mein agar magar bhi hai

ghair ne tegh par gila na dhara

koi mera sa be-jigar bhi hai

ghair kya marke mein aaenge

buz-dilon ka yahan guzar bhi hai

uTTho 'akbar' chalo madine ko

is se behtar koi safar bhi hai