sarw mein rang hai kuchh kuchh teri zebai ka

sarv meñ rañg hai kuchh kuchh tirī zebā.ī kā

jāma-e-gul meñ hai chhāpa tirī ra.anā.ī kā

paañv se raaz khulā bādiya-paimā.ī kā

jo phapholā thā DhiñDhorā huā rusvā.ī kā

saath aayā koī merī na koī jā.egā saath

morid-e-lutf azal se huuñ maiñ tanhā.ī kā

zulf kī ek hī jhaTke meñ kaleja phaḌkā

bahut ayyūb ko da.avā thā shakebā.ī kā

chaar din aur javānī ke guzar jaane do

haal pūchheñge javānoñ se tavānā.ī kā

josh meñ koī nahīñ jāma-darī kā maan.e

hathkaḌī haath pakaḌtī nahīñ saudā.ī kā

haal qābīl kā hābīl se pūchhe koī

vo zamāna hai ki bhaa.ī hai adū bhaa.ī kā

lashkar-e-ġham kī chaḌhā.ī hai ḳhabar-dār ai dil

morcha TūTne paa.ī na shakebā.ī kā

kyuuñ na palkeñ hoñ jafā-kār jo aafat hoñ bhaveñ

bal hai tīroñ ko kamānoñ kī tavānā.ī kā

koī sajda tirī dargāh kī qābil na huā

le chalā daaġh jabīñ par maiñ jabīñ-jā.ī kā

uf nahīñ karte haiñ ushshāq sitam sahte haiñ

kyā hī dilbar ko salīqa hai dil-ārā.ī kā

yaar kī husn-e-javānī kā maiñ dīvāna huuñ

ḳhat-e-ruḳhsār hai mahzar mirī rusvā.ī kā

misl-e-nai siine meñ paḌ jā.eñge chhed ai bulbul

na uḌā tarz mire zamzama-pairā.ī kā

aks ā.īne meñ sūrat kā patā detā hai

khul gayā hāl-e-duī se tirī yaktā.ī kā

apne hastī ko samajhtā rahe barbād insān

chaar unsur nahīñ jhoñkā hai ye chaupā.ī kā

barq girya hai shab-o-roz butoñ ke ġham meñ

'bahr' terā hai janam mardum-e-dariyā.ī kā

sarw mein rang hai kuchh kuchh teri zebai ka

jama-e-gul mein hai chhapa teri ranai ka

panw se raaz khula baadiya-paimai ka

jo phaphola tha DhinDhora hua ruswai ka

sath aaya koi meri na koi jaega sath

morid-e-lutf azal se hun main tanhai ka

zulf ki ek hi jhaTke mein kaleja phaDka

bahut ayyub ko dawa tha shakebai ka

chaar din aur jawani ke guzar jaane do

haal puchhenge jawanon se tawanai ka

josh mein koi nahin jama-dari ka mane

hathkaDi hath pakaDti nahin saudai ka

haal qabil ka habil se puchhe koi

wo zamana hai ki bhai hai adu bhai ka

lashkar-e-gham ki chaDhai hai KHabar-dar ai dil

morcha TuTne pai na shakebai ka

kyun na palken hon jafa-kar jo aafat hon bhawen

bal hai tiron ko kamanon ki tawanai ka

koi sajda teri dargah ki qabil na hua

le chala dagh jabin par main jabin-jai ka

uf nahin karte hain ushshaq sitam sahte hain

kya hi dilbar ko saliqa hai dil-arai ka

yar ki husn-e-jawani ka main diwana hun

KHat-e-ruKHsar hai mahzar meri ruswai ka

misl-e-nai sine mein paD jaenge chhed ai bulbul

na uDa tarz mere zamzama-pairai ka

aks aaine mein surat ka pata deta hai

khul gaya haal-e-dui se teri yaktai ka

apne hasti ko samajhta rahe barbaad insan

chaar unsur nahin jhonka hai ye chaupai ka

barq girya hai shab-o-roz buton ke gham mein

'bahr' tera hai janam mardum-e-dariyai ka