sat-tahzibon ka ek qarz jo purkhon ne parward kiya

sat-tahzīboñ kā ik qarz jo purkhoñ ne parvard kiyā

maiñ ne uThā kar farsh pe paTḳhā paañv se maslā gard kiyā

shor-e-darūñ kī tez havā ne ġhaar kā dahāna zard kiyā

bhūle-bhaTke dhyān kā ghoḌā āḳhir jism-navard kiyā

ajnabī des ke sāvan meñ rangoñ kī ret ne murjhā kar

surḳh lahū meñ niilī buuñd milā kar pahlū sard kiyā

ā.īna-poshī ke alqāb usī ke sar par jaa.ez haiñ

raushniyoñ kī bhiiḌ meñ jis ne apnā saaya fard kiyā

jins ke ḳhānoñ se bāhar ye safed havā.eñ kyā jāneñ

ḳhaak ko jazba-e-ishq ne mil kar achchhā-ḳhāsā mard kiyā

fitrat ke aa.iin ko daa.im kuchh to masraf chāhiye thā

aadhā bhaag sipurd-e-mashiyyat aadhā vaqf-e-dard kiyā

sat-tahzibon ka ek qarz jo purkhon ne parward kiya

main ne uTha kar farsh pe paTKHa panw se masla gard kiya

shor-e-darun ki tez hawa ne ghaar ka dahana zard kiya

bhule-bhaTke dhyan ka ghoDa aaKHir jism-naward kiya

ajnabi des ke sawan mein rangon ki ret ne murjha kar

surKH lahu mein nili bund mila kar pahlu sard kiya

aaina-poshi ke alqab usi ke sar par jaez hain

raushniyon ki bhiD mein jis ne apna saya fard kiya

jins ke KHanon se bahar ye safed hawaen kya jaanen

KHak ko jazba-e-ishq ne mil kar achchha-KHasa mard kiya

fitrat ke aain ko daim kuchh to masraf chahiye tha

aadha bhag sipurd-e-mashiyyat aadha waqf-e-dard kiya