sau bulandi bhi jo ho pasti hai

sau bulandī bhī jo ho pastī hai

apnī hastī bhī koī hastī hai

dāman-e-sabr na hāthoñ se chhuTe

ik tarah kī ye tahī-dastī hai

ġhair to ġhair haiñ ab āvāze

mujh pa merī hī fuġhāñ kastī hai

ham nahīñ bechte dil phir kyā hai

is meñ kuchh zor-zabardastī hai

ġhair sarshār-e-mai-e-naḳhvat hai

us ko mastī nahīñ bad-mastī hai

lākhoñ haiñ bechne vaale le lo

jins-e-dil ab to bahut sastī hai

us ke sar chaḌh ke na utrā ai zulf

har bulandī ke liye pastī hai

jin ko hāsil hai tavakkul un ko

fāqa-mastī meñ bhī ik mastī hai

dil kā kāñTā to nikāleñ aa kar

jin ko da.avā-e-subuk-dastī hai

ik nigah jins-e-vafā kī qīmat

unheñ mahñgī hai hameñ sastī hai

tujh pe miTnā hai hayāt-e-abadī

nīstī hī se mirī hastī hai

dil ke jaane pe maiñ rotā huuñ 'fahīm'

mujh pe ik ḳhalq-e-ḳhudā hañstī hai

sau bulandi bhi jo ho pasti hai

apni hasti bhi koi hasti hai

daman-e-sabr na hathon se chhuTe

ek tarah ki ye tahi-dasti hai

ghair to ghair hain ab aawaze

mujh pa meri hi fughan kasti hai

hum nahin bechte dil phir kya hai

is mein kuchh zor-zabardasti hai

ghair sarshaar-e-mai-e-naKHwat hai

us ko masti nahin bad-masti hai

lakhon hain bechne wale le lo

jins-e-dil ab to bahut sasti hai

us ke sar chaDh ke na utra ai zulf

har bulandi ke liye pasti hai

jin ko hasil hai tawakkul un ko

faqa-masti mein bhi ek masti hai

dil ka kanTa to nikalen aa kar

jin ko dawa-e-subuk-dasti hai

ek nigah jins-e-wafa ki qimat

unhen mahngi hai hamein sasti hai

tujh pe miTna hai hayat-e-abadi

nisti hi se meri hasti hai

dil ke jaane pe main rota hun 'fahim'

mujh pe ek KHalq-e-KHuda hansti hai