sauda-e-shahadat na ho jis sar mein wo sar kya

saudā-e-shahādat na ho jis sar meñ vo sar kyā

jis meñ na harārat ho na harkat vo sharar kyā

nik.hat ho na rangat to chaman meñ gul-e-tar kyā

jab ilm-o-hunar ho na bashar meñ to bashar kyā

jhuk jaa.e adū kā bhī na sar jis pe vo dar kyā

māhaul masarrat kā na ho jis meñ vo ghar kyā

siine se guzartī huī bātin meñ pahuñch kar

jo ālam-e-dil ko na badal de vo nazar kyā

ḳhurshīd-ba-kaf aa.e shab-e-shauq to kyā shab

jo shaam lapeTe hue aa.e vo sahar kyā

insān ke dukh meñ jo kabhī kaam na aa.e

phir us kī duāoñ kā haram meñ bhī asar kyā

insāñ ko jo dīvāna-e-insāñ na banā de

is daur meñ vo dars-gah-e-ilm-o-hunar kyā

ai be-ḳhabar is qalb-e-munavvar ke muqābil

ye raushnī-e-la.al-o-guhar shams-o-qamar kyā

vo chashm-e-taġhāful ho ki ho chashm-e-ināyat

dīvāne ko saaqī kī nigāhoñ kī ḳhabar kyā

afsurdagī-e-ġhuncha-o-gul ko jo baḌhā de

gulzār meñ vo bād-e-sabā bād-e-sahar kyā

dariyā ko jo ik nuur kā dariyā na banā de

gumnām tah-e-āb vo tābinda guhar kyā

ik bhiiḌ sī dekhī to kahā ham-safaroñ se

dekho zarā baḌh kar to ye 'amjad' kā hai ghar kyā

sauda-e-shahadat na ho jis sar mein wo sar kya

jis mein na hararat ho na harkat wo sharar kya

nikhat ho na rangat to chaman mein gul-e-tar kya

jab ilm-o-hunar ho na bashar mein to bashar kya

jhuk jae adu ka bhi na sar jis pe wo dar kya

mahaul masarrat ka na ho jis mein wo ghar kya

sine se guzarti hui baatin mein pahunch kar

jo aalam-e-dil ko na badal de wo nazar kya

KHurshid-ba-kaf aae shab-e-shauq to kya shab

jo sham lapeTe hue aae wo sahar kya

insan ke dukh mein jo kabhi kaam na aae

phir us ki duaon ka haram mein bhi asar kya

insan ko jo diwana-e-insan na bana de

is daur mein wo dars-gah-e-ilm-o-hunar kya

ai be-KHabar is qalb-e-munawwar ke muqabil

ye raushni-e-lal-o-guhar shams-o-qamar kya

wo chashm-e-taghaful ho ki ho chashm-e-inayat

diwane ko saqi ki nigahon ki KHabar kya

afsurdagi-e-ghuncha-o-gul ko jo baDha de

gulzar mein wo baad-e-saba baad-e-sahar kya

dariya ko jo ek nur ka dariya na bana de

gumnam tah-e-ab wo tabinda guhar kya

ek bhiD si dekhi to kaha ham-safaron se

dekho zara baDh kar to ye 'amjad' ka hai ghar kya