sauda hai jo dil de ke KHaridar se uljhe

saudā hai jo dil de ke ḳharīdār se uljhe

suljhe hue ham se na kabhī yaar se uljhe

hone na diyā rashk ne iz.hār-e-tamannā

har baat meñ ham apnī hī guftār se uljhe

uljhāv se uljhāv haiñ is ishq meñ yā-rab

dil-dār se aTke the ki aġhyār se uljhe

kyā sair ho shāne se laḌe gar dil-e-sad-chāk

ek ek giraftār giraftār se uljhe

aTke to kisī chashm-e-fusūñ-sāz se aTke

uljhe to kisī turra-e-tarrār se uljhe

chorī se bhī pahuñche na tire ghar meñ kabhī ham

barsoñ yūñhī ḳhār-e-sar-e-dīvār se uljhe

khulte nahīñ tum 'dāġh' ulajhtī hai tabī.at

achchhe kisī ayyār se makkār se uljhe

sauda hai jo dil de ke KHaridar se uljhe

suljhe hue hum se na kabhi yar se uljhe

hone na diya rashk ne izhaar-e-tamanna

har baat mein hum apni hi guftar se uljhe

uljhaw se uljhaw hain is ishq mein ya-rab

dil-dar se aTke the ki aghyar se uljhe

kya sair ho shane se laDe gar dil-e-sad-chaak

ek ek giraftar giraftar se uljhe

aTke to kisi chashm-e-fusun-saz se aTke

uljhe to kisi turra-e-tarrar se uljhe

chori se bhi pahunche na tere ghar mein kabhi hum

barson yunhi KHar-e-sar-e-diwar se uljhe

khulte nahin tum 'dagh' ulajhti hai tabiat

achchhe kisi ayyar se makkar se uljhe