sauda tumhaare ishq ka jis din se sar mein hai

saudā tumhāre ishq kā jis din se sar meñ hai

sāre-jahāñ kā dard hamāre jigar meñ hai

marne kī aarzū bhī nikal jā.egī kabhī

aisā kahāñ ki bair duā-o-asar meñ hai

josh-e-junūñ ko kis liye sahrā kī hai talāsh

sar phoḌne kā lutf to dīvār-o-dar meñ hai

har halqa-e-ḳhayāl hai tasvīr-e-rū-e-dost

afsūn-e-intizār ye kaisā nazar meñ hai

ai dil tavālat-e-shab-e-furqat kā kyā gila

nādān farq bhī koī shām-o-sahar meñ hai

is gardish-e-mudām se ghabrā.eñ kis liye

ik halqa-e-junūñ hai jo daur-e-qamar meñ hai

sajdoñ ne farq-e-naqsh-e-qadam bhī miTā diyā

aisā bhī ik maqām tirī rahguzar meñ hai

dil de chuke haiñ jaan bhī ab de ke dekh leñ

ik imtihān ye bhī hamārī nazar meñ hai

kah do shamīm ġhuncha-e-tāza-shagufta se

bū-e-charāġh-e-kustā bhī bād-e-sahar meñ hai

sauda tumhaare ishq ka jis din se sar mein hai

sare-jahan ka dard hamare jigar mein hai

marne ki aarzu bhi nikal jaegi kabhi

aisa kahan ki bair dua-o-asar mein hai

josh-e-junun ko kis liye sahra ki hai talash

sar phoDne ka lutf to diwar-o-dar mein hai

har halqa-e-KHayal hai taswir-e-ru-e-dost

afsun-e-intizar ye kaisa nazar mein hai

ai dil tawalat-e-shab-e-furqat ka kya gila

nadan farq bhi koi sham-o-sahar mein hai

is gardish-e-mudam se ghabraen kis liye

ek halqa-e-junun hai jo daur-e-qamar mein hai

sajdon ne farq-e-naqsh-e-qadam bhi miTa diya

aisa bhi ek maqam teri rahguzar mein hai

dil de chuke hain jaan bhi ab de ke dekh len

ek imtihan ye bhi hamari nazar mein hai

kah do shamim ghuncha-e-taza-shagufta se

bu-e-charagh-e-kusta bhi baad-e-sahar mein hai