saubat ka badal aasudgi ka pal nahin pakDa

sa.ūbat kā badal āsūdgī kā pal nahīñ pakḌā

safar meñ dhuup ke ham ne kabhī chhāgal nahīñ pakḌā

kahīñ ham se ziyāda aur ko un kī zarūrat ho

yahī kuchh soch kar ham ne kabhī bādal nahīñ pakḌā

ki jab se murdoñ kī saudāgarī haath aa ga.ī us ke

shikārī ne palaT kar phir kabhī jañgal nahīñ pakḌā

parinde jo ga.e lauTe nahīñ phir āshiyānoñ meñ

daraḳhtoñ ne bhī us ke baad koī phal nahīñ pakḌā

sadā bhīgī rahīñ ḳhauf-e-ḳhudā kī raushnā.ī se

mirī āñkhoñ ne duniyā kā diyā kājal nahīñ pakḌā

qanā.at aaj par kī hai parindoñ kī tarah maiñ ne

mire hāthoñ ne 'rahmānī' kisī pal kal nahīñ pakḌā

saubat ka badal aasudgi ka pal nahin pakDa

safar mein dhup ke hum ne kabhi chhagal nahin pakDa

kahin hum se ziyaada aur ko un ki zarurat ho

yahi kuchh soch kar hum ne kabhi baadal nahin pakDa

ki jab se murdon ki saudagari hath aa gai us ke

shikari ne palaT kar phir kabhi jangal nahin pakDa

parinde jo gae lauTe nahin phir aashiyanon mein

daraKHton ne bhi us ke baad koi phal nahin pakDa

sada bhigi rahin KHauf-e-KHuda ki raushnai se

meri aankhon ne duniya ka diya kajal nahin pakDa

qanaat aaj par ki hai parindon ki tarah main ne

mere hathon ne 'rahmani' kisi pal kal nahin pakDa