sawab-e-ishq ki KHatir kamal kar baiThe

savāb-e-ishq kī ḳhātir kamāl kar baiThe

vo merā shahr meñ rahnā muhāl kar baiThe

kuchh aur vo na sitamgar ḳhayāl kar baiThe

gadā-e-husn agar kuchh savāl kar baiThe

jo bevafā the unheñ baḳhsh dī matā-e-vafā

ye āshiqān-e-mohabbat kamāl kar baiThe

sunī na ek bhī zālim ne aarzū dil kī

ye kis ke sāmne ham arz-e-hāl kar baiThe

abhī to hosh meñ aa.e na the ye dīvāne

vo phir numā.ish-e-rū-e-jamāl kar baiThe

zarā sī der meñ naqsha badal gayā 'hairat'

mirī vafāoñ ko vo pā.emāl kar baiThe

sawab-e-ishq ki KHatir kamal kar baiThe

wo mera shahr mein rahna muhaal kar baiThe

kuchh aur wo na sitamgar KHayal kar baiThe

gada-e-husn agar kuchh sawal kar baiThe

jo bewafa the unhen baKHsh di mata-e-wafa

ye aashiqan-e-mohabbat kamal kar baiThe

suni na ek bhi zalim ne aarzu dil ki

ye kis ke samne hum arz-e-haal kar baiThe

abhi to hosh mein aae na the ye diwane

wo phir numaish-e-ru-e-jamal kar baiThe

zara si der mein naqsha badal gaya 'hairat'

meri wafaon ko wo paemal kar baiThe