sawad-e-sham se ta-subh-e-be-kinar gai

savād-e-shām se tā-sub.h-e-be-kinār ga.ī

tire liye to maiñ har baar haar haar ga.ī

kahāñ ke ḳhvāb ki āñkhoñ se tere lams ke ba.ad

hazār raat ga.ī aur be-shumār ga.ī

maiñ misl-e-mausam-e-ġham tere jism o jaañ meñ rahī

ki ḳhud bikhar ga.ī lekin tujhe nikhār ga.ī

kamāl-e-kam-nigahī hai ye e'tibār tirā

vahī nigāh bahut thī jo dil ke paar ga.ī

ajab sā silsila-e-nā-rasā.ī saath rahā

maiñ saath rah ke bhī aksar use pukār ga.ī

ḳhabar nahīñ ki ye pūchhūñ to kis se pūchhūñ maiñ

vahāñ talak maiñ ga.ī huuñ ki rahguzār ga.ī

sawad-e-sham se ta-subh-e-be-kinar gai

tere liye to main har bar haar haar gai

kahan ke KHwab ki aankhon se tere lams ke baad

hazar raat gai aur be-shumar gai

main misl-e-mausam-e-gham tere jism o jaan mein rahi

ki KHud bikhar gai lekin tujhe nikhaar gai

kamal-e-kam-nigahi hai ye e'tibar tera

wahi nigah bahut thi jo dil ke par gai

ajab sa silsila-e-na-rasai sath raha

main sath rah ke bhi aksar use pukar gai

KHabar nahin ki ye puchhun to kis se puchhun main

wahan talak main gai hun ki rahguzar gai