سواد شب غنیمت ہے ستارا جگمگاتا ہے

سواد شب غنیمت ہے ستارا جگمگاتا ہے

دلوں کی انجمن میں استعارا جگمگاتا ہے

کوئی طوفان آئے پار لگتی ہے مری کشتی

اندھیروں میں بھی دریا کا کنارا جگمگاتا ہے

بسایا ہے کسی نے میری آنکھوں میں دھنک منظر

کوئی بھی کام ہو اس کا اشارا جگمگاتا ہے

زمانے کے دیے اک ہی دئے سے جلتے ہیں لیکن

بساط فرد واحد کیا ادارہ جگمگاتا ہے

سہانے موسموں میں کس کی رنگت کا ہے یہ پرتو

دل شاداب پر کس کا اجارا جگمگاتا ہے

خلوص و سادگی ہے پھونس کے چھپر ہیں بستی میں

تعصب کی ہوا مت دو شرارا جگمگاتا ہے

کھڑے ہیں لوگ اہل زر کے آگے سر جھکائے کیوں

عظیمؔ اپنے خدا کا ہی سہارا جگمگاتا ہے